SERIKALI yatoa bilioni 1.3 kuboresha miundombinu ya elimu Mbinga

Imewekwa kuanzia tarehe: April 21st, 2024

SERIKALI imetoa shilingi bilioni 1.3 kwa ajili ya uboreshaji wa miundombinu ya elimu  katika shule za Sekondari zilizopo  Halmashauri  ya Wilaya ya Mbinga.

 Kaimu  Afisa Elimu Sekondari Halmashauri  ya Wilaya ya Mbinga Rashid Bundala amesema fedha hizo zimetolewa katika kipindi cha kuanzia mwaka 2023/2024.

Amebainisha kuwa kupitia fedha za  mapato ya ndani ya  Halmashauri  hiyo imetumia Shilingi  Milioni 184 kutekeleza ujenzi wa matundu 8 ya vyoo katika shule ya sekondari  Namswea, ujenzi wa matundu ya vyoo 12 katika shule ya Sekondari  Mkumbi  pamoja na ujenzi wa matundu 6 ya vyoo katika shule ya Sekondari Luhagara.

Bundala ameeleza kuwa Serikali kupitia mradi wa Secondary Education Quality Improvement Programme (SEQIP)  imetoa shilingi bilioni  1.1 kutekeleza  ujenzi wa shule mpya ya sekondari Kitumbalomo, ujenzi wa bweni shule ya sekondari Hagati,ukamilishaji  wa vyumba   Vitatu vya madarasa shule ya sekondari  Hilela, ukamilishaji  wa vyumba viwili vya madarasa katika shule ya sekondari  Kipapa  na ujenzi wa nyumba ya walimu  shule ya sekondari Mndeme.

Aidha amebainisha kuwa  Serikali  kupitia  mradi wa  Education perfomance for results ( EP4R) imetoa kiasi cha shilingi milioni 176 kutekeleza  ujenzi wa bweni moja na utengenezaji wa vitanda 40( double decker) katika shule ya Sekondari Ruanda  pamoja na ujenzi wa vyumba  viwili vya madarasa  katika shule ya Sekondari  Ruanda