SERIKALI yatoa milioni 500 kujenga lami KM Moja Madaba

Imewekwa kuanzia tarehe: July 12th, 2020

SERIKALI YATOA MILIONI 500 HALMASHAURI YA MADABA KUJENGA LAMI KM MOJA

SERIKALI ya awamu ya Tano imetoa jumla ya sh.milioni 500 kwa ajili ya kutekeleza mradi wa ujenzi wa barabara ya lami nyepesi ya kilometa moja katika Halmashauri ya Madaba wilaya ya Songea mkoani Ruvuma.

Meneja wa TARURA Halmashauri ya Madaba Mhandisi Razaro Kitomari  amesema fedha hizo zinajenga barabara ya Kipingo-Lita na kwamba mkataba wa mradi huo ni wa siku 180 ambao umeanzia Aprili 7 mwaka huu na unatarajia kumalizika Oktoba 6 mwaka huu.

Amesema utekelezaji wa mradi huo hadi sasa ni Zaidi ya asilimia 50 na kwamba lengo la TARURA ni kuhakikisha wanakamilisha ujenzi wa barabara hiyo kabla ya mkataba ambapo amesema hadi sasa kazi inakwenda vizuri kwa kuwa vifaa vyote vinavyohitajika vipo katika eneo la  mradi.

“Katika mwaka wa fedha wa 2019/2020 Halmashauri ya Madaba ni miongoni mwa Halmashauri 65 nchini ambazo zimepatiwa fedha  kwa ajili ya utekelezaji wa ahadi za viongozi katika program ya ,maendeleo’’,alisema Kitomari.

Akizungumza mara baada ya kukagua mradi huo,Mwenyekiti wa Kamati ya Siasa ya CCM Mkoa wa Ruvuma Odo Mwisho ameipongeza Halmashauri ya Madaba kwa kushirikiana na TARURA kwa kutekeleza mradi huo ambao unakwenda kuondoa changamoto ya ubovu wa barabara hiyo.

Ametoa rai kwa TARURA kuhakikisha kuwa wanajenga barabara hiyo katika viwango ambavyo vitaiwezesha barabara kudumu kwa muda mrefu kwa kuwa serikali inatoa fedha za walipa kodi ambazo zinatakiwa kutumika kulingana na thamani ya mradi uliotekelezwa.

Imeandikwa na Albano Midelo

Afisa Habari Mkoa wa Ruvuma

Julai 13,2020