SERIKALI yawatahadharisha walimu Mbinga

Imewekwa kuanzia tarehe: March 21st, 2025

Mbinga, Ruvuma – Serikali ya Wilaya ya Mbinga imewataka walimu kujiepusha na masuala ya siasa wanapokuwa kazini na badala yake kuzingatia sheria, kanuni, na miongozo ya sekta ya elimu ili kuepuka migogoro na athari kazini.

Mkuu wa Wilaya ya Mbinga, Kisare Makori, alitoa kauli hiyo  kwenye Mkutano Mkuu wa mwaka wa Chama cha Walimu Tanzania (CWT) Wilaya ya Mbinga, uliofanyika katika ukumbi wa St Kiliani, Mbinga Mjini.

Makori alisema walimu wanapaswa kujitathmini kila siku kuhusu mchango wao katika taaluma badala ya kujiingiza kwenye siasa zisizo na tija.

Alisisitiza kuwa walimu ni msingi wa maendeleo ya taifa, na Serikali ya awamu ya sita chini ya Rais Samia Suluhu Hassan inaendelea kuboresha sekta ya elimu na mazingira ya kazi ya walimu.

Alieleza kuwa Serikali inafanya juhudi za kuboresha maslahi ya walimu, ikiwa ni pamoja na kuhakikisha wanapandishwa madaraja kwa wakati kulingana na mwongozo wa utumishi wa umma.

Aidha, Makori aliwasihi walimu kushirikiana na Serikali katika kuinua sekta ya elimu, kuendelea kujiendeleza kitaaluma,

Katika hatua nyingine, aliziagiza Halmashauri za Wilaya na Mji wa Mbinga kutumia mapato ya ndani kulipa madeni ya walimu ili kuongeza motisha kazini na kuinua kiwango cha taaluma mashuleni.