TANI 10 za mkaa mbadala zakabidhiwa shule za msingi na sekondari

Imewekwa kuanzia tarehe: July 17th, 2024

Tani 10  za mkaa mbadala utokanao na makaa ya mawezimekabidhiwa  kwa shule za Msingi 15 na  shule za Sekondari 15  za Halmashauri  ya Wilaya ya Mbinga kwa ajili ya kupikia lengo likiwa ni kutekeleza agizo la matumizi ya nishati safi lilitolewa na  Rais wa Jamhuri ya Muungano wa Tanzania Mhe. Dkt. Samia Suluhu Hassan.

Mkaa huo umekabidhiwa na mgeni rasmi  Mkuu wa Wilaya ya Mbinga Mhe. Kisare Makori katika  Halfa ya Ugawaji wa Mkaa Mbadala Utokanao na Makaa ya Mawe iliyofanyika katika Shule ya Sekondari ya wasichana Mbinga  Julai 11, 2024.

Akikabidhi mkaa huo Mhe. Kisare amempongeza Mkurugenzi wa Halmashauri ya Wilaya ya Mbinga Joseph Kashushura   kwa kuchukua hatua katika kutekeleza  agizo la Mhe. Rais na kusisitiza  kuwa huo ni mfano wa kuigwa  na wengine.

Amesema" Nikupongeze Mkurugenzi  kwa kweli umefanya jambo kubwa sana na la kuigwa  sio tu tumekabidhi lakini umeacha alama kwa shule hizi na kuhamasisha taasisi nyingine zitumie mkaa huu"

Akisoma taarifa  katika hafla hiyo Mkurugenzi  wa Halmashauri ya Wilaya ya Mbinga  Joseph Kashushura  amebainisha kuwa katika kutekeleza  agizo la Mhe. Rais  la katazo la matumizi ya nishati chafu , Halmashauri ya Wilaya ya Mbinga imeanza  na shule za Sekondari na Msingi ili kuondokana na  matumizi ya kuni na mkaa wakati wa kupika chakula.

"Tani hizi zilizotolewa ni moja ya mkakati  wa  kuhakikisha Halmashauri  yetu inatumia nishati safi na kuacha uharibifu wa mazingira  kwakuwa miti mingi inakatwa kwa ajili ya kupata kuni au mkaa wa kupikia" Amebainisha  Kashushura 

Akizungumza kwa niaba ya walimu wakuu wa Halmashauri  ya Wilaya ya Mbinga  Mkuu wa Shule ya Sekondari  ya Mndeme mwalimu  Denterias Mgaya amesema  mkaa huu utapunguza gharama lakini pia ni  chachu katika kutunza mazingira.

Watengenezaji na wauzaji wa mkaa huo ni kikundi cha wanawake Mbalawala  kilichopo kata ya Ruanda  kikundi ambacho ni wanufaika wa mkopo wa 10% unaotolewa na Halmashauri ya Wilaya ya Mbinga.