TRA Ruvuma kupambana na wafanyabiashara wanaokwepa kodi

Imewekwa kuanzia tarehe: February 14th, 2025

Kamishna Mkuu wa Mamlaka ya Mapato Tanzania (TRA), Yusuph Mwenda, ameahidi kupambana na wafanyabiashara wanaokwepa kodi ili kulinda haki ya walipa kodi waaminifu. Amesema hatua hiyo inalenga kuhakikisha kila mfanyabiashara anatimiza wajibu wake na TRA inafanikisha malengo ya ukusanyaji kodi.

WAFANYABIASHARA WATAKIWA KUTOA USHIRIKIANO KWA TRA

Akizungumza katika kikao na wafanyabiashara wa Mkoa wa Ruvuma, Februari 13, 2025, mjini Songea, Mwenda amewasihi wafanyabiashara kuona ulipaji wa kodi kama fahari badala ya kikwazo. Amewataka kushirikiana na TRA kwa dhati ili kufanikisha maendeleo ya taifa.

TRA HAIWAVUMILII WATUMISHI WASIO WAADILIFU

Mwenda amewataka wafanyabiashara kuripoti watumishi wa TRA wanaotaka kupokea rushwa, akisisitiza kuwa mamlaka hiyo haitawavumilia watumishi wasio waadilifu. Amehimiza wafanyabiashara kufikisha malalamiko yao kwa uongozi wa TRA ili hatua stahiki zichukuliwe.

WAFANYABIASHARA WAPONGEZWA KWA ULIPAJI KODI

Kamishna Mkuu ameupongeza Mkoa wa Ruvuma kwa kuvuka lengo la ulipaji kodi kwa mwaka wa fedha uliopita. Ameagiza Meneja wa TRA wa mkoa huo, Nicodemus Mwakilembe, kuhakikisha makadirio ya kodi yanazingatia tathmini ya moja kwa moja kwa wafanyabiashara kwenye maeneo yao ili kuhakikisha usawa.

MWENYEKITI WA WAFANYABIASHARA ATOA WITO

Mwenyekiti wa wafanyabiashara wa Mkoa wa Ruvuma, Titus Mbilinyi, ameishukuru TRA kwa juhudi zao za kutatua changamoto za wafanyabiashara. Amehimiza ulipaji wa kodi kwa hiari ili kuhakikisha maendeleo ya huduma za jamii kama barabara, afya, na elimu. Amewataka TRA kupokea na kufanyia kazi maoni na malalamiko ya wafanyabiashara.