UFUTA wawaingizia wakulima Ruvuma bilioni 16.8

Imewekwa kuanzia tarehe: June 10th, 2020

WAKULIMA wa zao la ufuta katika Wilaya za Namtumbo,Songea na Tunduru mkoani Ruvuma wameanza kunufaika na zao hilo baada ya kupokea shilingi bilioni 16.8 tangu kuanza kuuza zao hilo kwa mfumo wa stakabadhi ghalani Apirili 30 mwaka huu.

Hayo yamesemwa na  Mkuu wa Mkoa wa Ruvuma Christina Mndeme  wakati anafungua kikao maalum cha Baraza la madiwani la Halmashauri ya Namtumbo cha kujadili Hoja na mapendekezo ya Mdhibiti na Mkaguzi  Mkuu wa Hesabu za Serikali (CAG).

“Mpaka sasa katika minada ya Songea,Namtumbo na Tunduru zimeuzwa kilo milioni 8.2 za zao la ufuta zilizosababisha wakulima kupata sh.bilioni 16.8 ambazo zitaendelea  kuongezeka kupitia minada inayokuja’’,alisisitiza Mndeme.

Mndeme amesema tangu kufunguliwa kwa mnada, vyama  vya ushirika AMCOS kupitia zao la ufuta vimekwishapata  zaidi ya sh.milioni 500 na ushuru uliopatikana kwenye vyama vikuu  vya ushirika SUNAMCO na TAMCO ni shilingi  milioni 2.48.

Amesisitiza kuwa  Mkoa wa Ruvuma umeendelea kuonesha mafanikio makubwa kupitia mfumo wa stakabadhi ghalani na kwamba mfumo huo utaendelea kutumika kwenye mazao ya soya na Mbaazi ili  kulinda haki ya wakulima.

 Mndeme amesema  Mkoa wa Ruvuma msimu huu unatarajia kuendelea kuwa gwiji katika mazao ya chakula ambapo  mahitaji ya chakula katika Mkoa wa Ruvuma ni tani laki 3.38 hadi sasa Mkoa  una ziada ya chakula zaidi ya tani laki tisa.

Amesisitiza kuwa Mkoa wa Ruvuma ni miongoni mwa mikoa inayofanya vizuri katika uzalishaji wa mazao ya chakula na biashara nchini  na kwamba  hadi kufikia Mei 15 mwaka huu  zilikuwa zimevuna tani milioni  1.3.

Wakati huo huo Mndeme  amewapongeza Halmashauri ya Namtumbo kwa kupata hati safi ya ripoti ya CAG kwa miaka minne mfululizo kuanzia mwaka 2015/2016 hadi 2018/2019.

Mndeme amewapongeza Madiwani na watalaam kwa kuweza kuchangia asilimia 99.77 katika mfuko wa wanawake,wazee,vijana na watu wenye ulemavu na   kukusanya mapato ya ndani Zaidi ya Sh. bilioni 1.94 katika mwaka wa fedha wa  2018/2019.

Imeandaliwa   Albano Midelo

Afisa Habari wa Mkoa wa Ruvuma

Juni 10,2020

Namtumbo