UJENZI wa kituo cha afya Mtakanini Namtumbo wafikia asilimia 95

Imewekwa kuanzia tarehe: June 12th, 2020

UBORESHAJI wa kituo cha afya Mtakanini katika Halmasauri ya Wilaya ya Namtumbo mkoani Ruvuma ,ambao serikali ilitoa sh.milioni 400  umefikia asilimia 95.

Kaimu Mganga Mkuu wa Halmashauri ya Wilaya hiyo Dr.Godwin Luta akitoa taarifa ya  kituo hicho kwa Mkuu wa Mkoa wa Ruvuma,amesema ujenzi wa kituo hicho ni utekelezaji wa Ilani ya CCM wa kuhakikisha kila kata inakuwa na kituo cha afya.

Amesema kiasi hicho cha fedha kimetumika kujenga jengo la wagonjwa wa nje,maabara,choo cha wagonjwa wa nje,jengo la kufulia,chumba cha upasuaji na ukarabati wa jengo la mama na mtoto.

“Mradi huu utakapokamilika kwa asilimia 100,tutakuwa tumewapunguzia wananchi kero ya kusafiri umbali mrefu wa kutafuta huduma ya afya na upasuaji nje ya Halmashauri ya Namtumbo’’,alisisitiza.

Hata hivyo amesema hadi sasa zimetumika zaidi ya Sh.milioni 300 kutekeleza mradi huo na kwamba zimebaki shilingi milioni 95 kwa ajili ya kukamilisha majengo hayo.

Akizungumza mara baada ya kukagua majengo ya kituo hicho,Mkuu wa Mkoa wa Ruvuma Christina Mndeme amewapongeza  wananchi hao kwa kufikia hatua kubwa ya ujenzi unaotarajia kukamilika hivi karibuni.

Amesema serikali kwa wakati mmoja ilitoa fedha kiasi cha shilingi  bilioni 1.2 kwa ajili ya ujenzi wa  vituo vya afya vitatu mkoani Ruvuma, ambavyo ni Mgagagura,Mtakanini na Matimira.

Hata hivyo amesema vituo vingine bado havijaanza  ujenzi wakati kituo cha afya Mtakanini kipo katika hatua za mwisho kukamilisha ujenzi.

Amesema ataviagiza vituo vingine ambavyo bado havijatekeleza mradi huo kufika kujifunza katika kituo cha afya Mtakanini kutokana na kufanya kazi nzuri ya ujenzi wa majengo sita na fedha imebaki.

“Kwa kuwa ujenzi unakwenda mwisho,nakuomba Mkurugenzi uanze mchakato wa manunuzi wa vifaa vya kituo hiki,vikiwemo vitanda, madogoro, mashuka,dawa na vifaa vingine vinavyotumika katika huduma ya afya’’,alisisitiza.

Mndeme pia amewaagiza RUWASA wilaya ya Namtumbo kupeleka maji katika kituo hicho, TANESCO kupeleka huduma ya umeme na TARURA  kukamilisha matengenezo ya barabara haraka.

Imeandikwa na Albano Midelo

Afisa Habari wa Mkoa wa Ruvuma

Juni 12,2020