UTEKELEZAJI wa ilani ya CCM miaka mitano mkoani Ruvuma katika sekta ya elimu

Imewekwa kuanzia tarehe: July 19th, 2020

MKUU wa Mkoa wa Ruvuma Christina Mndeme anatoa taarifa ya utekelezaji wa Ilani ya CCM ya miaka mitano kuanzia mwaka 2015 hadi 2020

SEKTA YA ELIMU

• Maelekezo ya Ilani ya CCM ya Uchaguzi ya mwaka 2015 katika sekta ya Elimu ni kuhakikisha elimu katika ngazi zote inakuwa na ubora unaostahili ili kuwezesha vijana na makundi mengine kumudu ushindani wa soko la ajira ambalo wigo wake umepanuka ndani na nje ya Jumuiya ya Afrika Mashariki. Msisitizo mkubwa wa Serikali ni kuendelea kusimamia utekelezaji wa Sera ya Elimu na Mafunzo ya mwaka 2014.
•  
• Hali ya utoaji wa Elimu, taaluma Na miundombinu ya shule katika Mkoa 
• Katika kutekeleza maelekezo ya Ilani, Mkoa umefanya jitihada mbalimbali katika kuboresha sekta ya elimu kwenye ngazi zote.
• UTEKELEZAJI WA ILANI YA CHAMA CHA MAPINDUZI TANGU 2015-2020

Idadi ya Shule; Tangu mwaka 2015 hadi 2020 Mkoa umekuwa na ongezeko la idadi ya shule za msingi 103 kutoka  idadi ya shule 670 zilizokuwepo  mwaka 2015 hadi shule  773 mwaka 2020. Shule za sekondari zimeongezeka kutoka idadi ya shule 111 mwaka 2015 hadi shule 205 kufikia mwaka 2020 sawa na asilimia 54 ambalo ni ongezeko la shule 94.

Uandikishaji wa  wanafunzi umeongezeka na kuimarika ambapo kuna ongezeko la uandikishaji wa wanafunzi wa darasa la kwanza kwa idadi ya wanafunzi  50021  hadi kufikia Juni 2020 ukilinganisha na idadi ya wanafunzi 47978  mwaka 2015 sawa na  ongezeko la asilmia 4.2 .

Mafanikio ya uandikishaji na mahudhurio ya wanafunzi yameimarika  pia kwa upande wa elimu ya Sekondari ambapo hadi Juni 2020 kuna wanafunzi 74,613 ukilinganisha na wanafunzi 55,643 waliokuwa shuleni mwaka 2015. Ongezeko hili ni la wanafunzi 18,970  sawa na asilimia 75.

Mafanikio haya yametokana na Mpango wa Utoaji wa Elimu Bure unaowezeshwa na Serikali ya awamu ya tano ya Mhe, Rais Dkt. John Pombe Joseph Magufuli ikiwa ni pamoja na;

• Kuongezeka kwa miundombinu ya vyumba vya madarasa, nyumba za walimu, Mabweni, vyoo, mabwalo na maabara.
• Ununuzi wa vifaa vya kujifunza na kufundishia hususani vitabu vya ziada na kiada kwa wanafunzi ambavyo vimegawiwa katika shule zote.

Hali ya ufaulu wa mtihani ya Kitaifa; Ufaulu katika mitihani ya darasa  la saba, kidato cha nne na kidato cha sita umeongezeka hadi mwaka 2019 ukilinganisha na hali ilivyokuwa mwaka 2015.

Miundombinu katika Sekta ya Elimu;

Katika kutekeleza Ilani ya Chama Cha Mapinduzi Mhe, Rais ametupatia fedha za utekelezaji wa miradi ya sekta ya elimu kiasi cha shilingi 15,328,933,835.29 kuwezesha uwepo wa miundombinu katika Sekta ya Elimu kama inavyoonesha katika jedwali lifuatalo;

• Utekelezaji wa Programu ya Elimu Bila Malipo

Mhe. Rais amekuwa akiupatia Mkoa fedha kwa ajili ya kutekeleza Mpango wa Elimu Bila Malipo tangu mwaka 2015 ambapo jumla ya Tshs.  26,707,325,111.30 zimepokelewa kwa muda wa miaka mitano hadi kufikia mwaka 2020.

• Utekelezaji wa Mpango huu umeleta mafanikio katika kuongeza kiwango cha uandikishaji kwa wanafunzi wa darasa la awali, la kwanza na kidato cha kwanza pamoja na kuimarisha usimamizi wa uboreshaji wa Elimu katika ngazi ya shule na kata ikiwemo kuimarisha taaluma na kuongeza ufaulu wa wanafunzi katika mitihani.

Tunaendelea kuipongeza Serikali ya Awamu ya Tano chini ya Dkt.John Pombe Joseph Magufuli kwa kuanzisha Mpango huu wa elimu bure kwa watanzania.

Vituo vya Ufundi Stadi na VETA

Katika utekelezaji wa Ilani ya Chama Cha Mapinduzi, Mhe, Rais ameboresha eneo la mafunzo ya ufundi stadi ambapo kwa Mkoa sasa kuna vyuo 3 vya VETA hadi mwaka 2020 kutoka chuo 1 mwaka 2015. Hii ni baada ya kuletewa fedha za ujenzi wa vyuo 2 vya VETA vya Nyasa na Namtumbo ambapo chuo cha VETA Namtumbo kimegharimu Tsh. biln. 4. Na VETA Nyasa Tsh. 2,196,581,105.29 na hivyo ufanya jumla ya fedha iliyotumika kuwa shilingi  6,196,581,105.29

Vyuo vya Ualimu na Elimu ya Juu

Vyuo vya Ualimu

Mkoa una vyuo vya ualimu 3 vinavyotoa mafunzo ya ualimu. Kati ya hivyo chuo cha ualimu Songea ni cha Serikali na 2 ambavyo ni chuo cha ualimu Kiuma na Chuo cha Ualimu Nazaleti vinamilikiwa na mashirika binafsi.

Ili kuweka mazingira bora ya kufundisha na kujifunzia katika kipindi cha  miaka mitano Mhe, Rais ametuletea fedha kwa ajili ya ukarabati wa chuo cha ualimu Songea kwa thamani ya fedha shilingi 1,485,760,357.26.

Elimu ya Juu

Mkoa kwa kushirikiana na Serikali, wadau wa maendeleo unaendelea kuhamasisha uwekezaji katika eneo la uanzishaji wa vyuo vya elimu ya juu. Hadi kufikia mwaka 2020 kuna vyuo vya elimu ya juu 3 ukilinganisha na uwepo wa chuo 1 ilipokuwa 2015. Vyuo hivyo ni matawi 2 ya Chuo Kikuu huria cha Tanzania katika wilaya ya Tunduru na Songea. Vyuo vingine ni Tawi la chuo Kiuu Cha Kilimo Sokoine (SUA) kilichopo wilaya ya Tunduru na chuo cha maliasili na Utalii kinachojengwa wilaya ya Nyasa.

• Miradi inayoendelea

Katika utekelezaji wa Ilani ya CCM ya miaka mitano jumla ya miradi 2558 yenye thamani ya shilingi 8,525,829,742 inaendelea kutekelezwa katika ujenzi wa miundombinu ya madarasa, vyoo vya wanafunzi, mabweni na  mabwalo kama ilivyoainishwa katika jedwali lifuatalo;

Shughuli nyingine zilizotekelezwa na mafanikio yaliyopatikana kwa mwaka 2015-2020

• Katika kuimarisha usimamizi na ufatiliaji wa shughuli za elimu Mkoa ulipokea magari 4 kutoka kwa Mhe. Rais kwa ajili ya Ofisi ya Elimu Mkoa, Chuo cha Ualimu Songea na Ofisi 2 za uthibiti ubora kwa Halmashauri za Nyasa na Manispaa ya Songea. Vilevile, Mhe. Rais ametoa pikipiki 175 kwa Maafisa Elimu Kata kwa lengo la kuimarisha usimamizi na ufuatiliaji wa elimu katika ngazi ya kata, jambo ambalo limewaondelea changamoto ya usafiri.
• Serikali imeimarisha mazingira ya utendaji ya Wathibiti Ubora wa Elimu kwa kujenga ofisi 5 zenye jumla ya thamani ya shilingi 760,162,500/= katika halmashauri za wilaya za Tunduru, Songea, Mbinga, Nyasa na Manispaa ya Songea.

Mafanikio haya yanayoonekana wazi kwa kipindi cha miaka mitano katika sekta ya elimu yametokana na utashi mkubwa alionao Mhe. Rais katika kuwaletea maendeleo watanzania kupitia sekta ya elimu.

ITAENDELEA KATIKA SEKTA YA AFYA