WABUNGE Ruvuma wapongezwa kwa kuwatumikia wananchi

Imewekwa kuanzia tarehe: March 10th, 2025

Mkuu wa Wilaya ya Songea, mkoani Ruvuma Kapenjama Ndile, amepongeza juhudi za wabunge Jenista Mhagama na Msongozi katika kusukuma mbele maendeleo ya wananchi.

Akizungumza kwenye uzinduzi wa Siku ya Wanawake Duniani katika viwanja vya Soko Kuu, Manispaa ya Songea, alisema wabunge hao wameonesha kujali wananchi kupitia mikakati mbalimbali ya kijamii na kiuchumi.

Ndile alieleza kuwa Mbunge Msongozi ni mtu wa kujali wananchi, kwani kila anaporudi kutoka safari, hupitia ofisi za Mkuu wa Mkoa na baadaye ofisini kwake kuulizia changamoto zilizopo.

Aliongeza kuwa Mbunge huyo pia huchukua hatua haraka pale anapopokea taarifa za matatizo kutoka kwa wananchi wake.

Aidha, alimtaja Mbunge Jenista Mhagama kuwa ni kiongozi mwenye moyo wa kusaidia, kwani anapopokea taarifa za maafa au matatizo ya wananchi, huwa hawezi kuzihifadhi peke yake bali huzifikisha kwa wahusika ili kutafutiwa suluhisho.

Mkuu huyo wa Wilaya alisema utendaji huo ni mfano wa uwajibikaji mzuri unaopaswa kuigwa na viongozi wengine.

Ndile alibainisha kuwa wabunge wanaofanya kazi kwa ukaribu na wananchi na kushirikiana na viongozi wa serikali mara nyingi huleta mabadiliko chanya katika maeneo yao.