WACHINA kuwekeza hekari 10,000 za kilimo cha mazao ya mifugo Madaba

Imewekwa kuanzia tarehe: February 20th, 2024

Wawekezaji wa Kampuni ya Xiwang kutoka nchini China wamepewa shamba lenye Hekari 10,000 lililopo Kijiji cha Ngadinda Kata ya Gumbiro Halmashauri ya Wilaya ya Madaba wilayani Songea mkoani Ruvuma kwaajili uwekezaji wa kilimo cha mazao ya mifugo.

 Mbunge wa Jimbo la Madaba Mheshimiwa Joseph Mhagama akizungumza kwenye eneo hilo amesema shamba hilo la Serikali lilikuwa na hekari 15,000 ambapo hekari 5000 wamepewa wananchi kwaajili ya kilimo.

“Wananchi mmepewa hekari 5000 na eneo lililobaki tunampa mwekezaji  naomba tutoe ushirikiano kwa mwekezaji”,alisema Mhagama.

Meneja wa Kampuni ya XIWANG Savio Chanahi amesema wamejipanga kuzalishaji mahindi ya njano,soya na ufuta na watakuwa wanabadilisha mazao kwa kurutubisha ardhi  ili kulinda mazingira.

Amesema Wizara itakapowakabidhi rasmi Shamba  hilo ndani ya miezi miwili wataanza kupeleka vifaa kwa ajili ya kuanza kazi.