WAFUGAJI Tunduru waomba kusogezewa huduma ya uchunguzi wa kifua kikuu

Imewekwa kuanzia tarehe: July 17th, 2023

WANANCHI wa jamii ya kifugaji wilayani Tunduru,wameiomba serikali  kuwasogezea huduma za  afya ikiwemo  za uchunguzi wa ugonjwa wa kifua kikuu katika maeneo yao ili kuepusha uwezekano wa kuambukizwa ugonjwa huo.

Wametoa ombi hilo jana,kwa wataalam wa kitengo cha kifua kikuu na ukoma kutoka Hospitali ya wilaya Tunduru wakati wa kampeni ya uelimishaji na uchunguzi wa vimelea vya ugonjwa huo kwa jamii ya wafugaji  wanaoishi katika kijiji cha Mkowela wilayani humo.

Samwel Mandalu(65) alisema,wakati umefika kwa serikali kutoa upendeleo  kwa kuwajengea zahanati katika maeneo yao ili waweze kupata  huduma za afya ikiwemo uchunguzi wa ugonjwa kifua kikuu.

Alisema,kutokana na mazingira na shughuli zao kufanyika mbali na makazi  ya watu wengine inakuwa vigumu kufikiwa na elimu ya afya mara kwa mara.Alisema,watashukuru iwapo serikali  itapeleka huduma za afya kwenye maeneo yao ili iwe rahisi kupata elimu juu ya ugonjwa wa kifua kikuu na magonjwa mengine.

Alisema kuwa,wafugaji wengi wanaishi kwenye vitalu maeneo ya porini ambako wanategemea dawa za asili  tu kama tiba ya maradhi yao huku baadhi yao hawajawahi kukutana na wataalam wala kufika Hospitali katika maisha yao yote.

Kwa upande wake Mganga mfawidhi  wa zahanati ya Mkowela Dkt Neema Msangilwa alisema,kwa mwaka 2022 walifanikiwa kuibua wagonjwa 100 wa kifua kikuu.

Alisema,wagonjwa hao walipatikana kupitia kampeni mbalimbali zinazofanyika na wengine walipatikana kupitia dalili zinazoonyesha wanapofika  zahanati kwa ajili ya kupata matibabu.

Alisema kijiji cha Mkowela kina zaidi ya watu elfu mbili,hivyo watu 100 wenye kifua kikuu ni wengi mno,ambapo ameiomba serikali kuendelea kufanya kampeni hizo mara kwa mara ili kupunguza maambukizi ya ugonjwa huo.