WALIMU 1,000 Ruvuma wawasilisha kero zao kwa Samia Teachers Clinic

Imewekwa kuanzia tarehe: January 18th, 2025

Walimu  1,000 wa shule  za msingi na sekondari mkoani Ruvuma  wamejitokeza kuwasilisha kero zao  wa wajumbe wa Kliniki Maalum ya kushughulikia  kero za walimu (Samia Teachers Clinic) kutoka Ofisi ya Rais TAMISEMI.

 Walimu hao wamejitokeza kwenye ukumbi wa Kanisa Anglikana Dayosisi ya Ruvuma mjini Songea katika Timu ya Samia Teachers Clinic ambayo imeanzishwa kwa lengo la  kusikiliza na kutatua changamoto za walimu kote nchini.

Akizungumza kwenye kikao hicho  ambacho kiliwakutanisha walimu Zaidi ya 1,000 kutoka Wilaya zote za Mkoa wa Ruvuma,Katibu Tawala wa Mkoa wa Ruvuma Ndugu Mary Makondo amewapongeza walimu waliojitokeza kuwasilisha kero zao.

“Walimu wengi wamefikiwa na maafisa waandamizi kutoka Ofisi ya Rais TAMISEMI wakiwa na laptop kwa ajili ya kutatua  kero zao kwenye mifumo’’,alisema Makondo.

Kwa upande wake Afisa Elimu Mkoa wa Ruvuma Mwl. Edith Mpenzile  amesema walimu wamekuwa wanakabiliwa na kero mbalimbali hivyo kitendo hicho kinawatia moyo walimu na kuwa na ari katika uwajibikaji wanapokuwa darasani.

Naye  Makamu wa Rais wa CWT Taifa Mwl. Suleiman Ikomba amezitaja baadhi ya changamoto zinazowakabili walimu nchini kuwa ni  miundo ya utumishi wa walimu,madaraja ya mseleleko,kucheleweshwa kupandishwa madaraja na madai ya mapunjo mbalimbali ya mishahara.