WANANCHI waridhia kuvunja nyumba kupisha ujenzi wa barabara Mbinga

Imewekwa kuanzia tarehe: August 17th, 2022

WANANCHI wanaoishi kando kando ya barabara ya Kitai-Luanda- Lituhi inayojengwa kwa kiwango cha lami na wakala wa barabara Tanroads mkoa wa Ruvuma,  wameanza kuvunja nyumba zao kwa hiari ili kupisha  kazi ya ujenzi wa barabara hiyo.

Wakizungumza kwa nyakati tofauti walisema,wameamua kuvunja nyumba zao kwa kuwa mradi huo ni muhimu kuliko hata nyumba zao kwani kwa muda mrefu walikuwa wanapata mateso makubwa  ya usafiri  ,usafirishaji wa bidhaa na madhara ya kiafya.

Halfan Nambasi  mkazi wa kijiji cha Amani makolo alisema,kile kinachofanywa na serikali kina thamani kubwa kuliko nyumbani zao, na ameipongeza sana serikali kupitia Tanroads mkoa wa Ruvuma kwa kujenga barabara hiyo kwa kiwango cha lami kwani.

Alisema,kujengwa kwa barabara hiyo kwa kiwango cha lami kutaharakisha sana kukua kwa uchumi na kupungua kwa gharama ya usafiri kwa wananchi na usafirishji wa mizigo.

Nambasi alisema,barabara hiyo ni ukombozi mkubwa kwa wakazi wa vijiji mbalimbali kwa sababu licha ya itakwenda kuharakisha kukua kwa uchumi wa vijiji hivyo, itahamasisha  wawekezaji wengi kwenda kuwekeza katika madini yanayopatikana kwa wingi katika ukanda huo.

Aidha,ameiomba serikali kupitia Tanroads kuwa karibu na mkandarasi ili aweze kukamilisha kazi hiyo kwa wakati na ajenge kwa viwango ili kuepusha usumbufu unaoweza kutokea wa kufanya matengenezo ya mara kwa  mara.

Alisema,barabara hiyo ndiyo uti wa mgongo kwa uchumi wa wilaya ya Mbinga na mkoa wa Ruvuma kwa sababu barabara ndiyo inayotumika kupita malori shehena ya makaa wa mawe kutoka kwenye migodi  kwenda  maeneo mbalimbali hapa nchini.

Osias Haule alisema, kwa muda mrefu walikuwa  katika mateso na  kupata madhara makubwa kiafya kutokana na vumbi kubwa linalotoka barabarani na kuingia majumbani pindi malori ya makaa ya mawe yanapopita na kuna baadhi ya watu wamepoteza maisha yao kwa sababu ya kutojua njia sahihi ya kujkinga na vumbi la makaa ya mawe.

Alisema,baadhi ya wananchi walichukia uwekezaji huo licha ya kuwa na manufaa makubwa yanayopatikana,lakini hawana uwezo wa kuzuia magari yasipite katika bara bara hiyo bali waliendelea kuumia huku wakimuomba Mungu awanusuru na mateso hayo.

Alisema, mara baada ya kuona serikali imeanza kujenga kwa lami  sasa wananchi wengi wana furaha na  kwa kuwa  baada ya muda mfupi wataondokana na  kero hiyo na kuipongeza serikali ya awamu ya sita kwa  hatua hiyo.

Benedict Haule mwenyekiti mstaafu wa kijiji cha Amani makolo alisema, hiyo ni hatua kubwa kwa wananchi wa maeneo hayo na wilaya ya Mbinga kwa ujumla na amewaomba wananchi ambao bado hawajabomoa nyumba zao kufanya hivyo ili  kupisha kazi  ya ujenzi ili iweze kukamilika kwa muda uliopangwa.

Kwa upande wake msimamizi wa mradi huo kutoka wakala wa barabara mkoa wa Tanroads mkoa wa Ruvuma Andrew Sanga alisema,barabara hiyo inajengwa na kampuni ya China Ralway Seventh Group Ltd(CRSG) kutoa nchini China.

Alisema,katika awamu ya kwanza itajengwa urefu wa km 35 kwa kiwango cha lami kutoka kijiji cha Amani makolo hadi Luanda,lakini katika mpango wa baadaye serikali inakusudia kujenga barabara hiyo  hadi Lituhi.

Alisema,kwa sasa kazi inafanyika katika kipande cha Kitai kuelekea Luanda ambapo katika hatua ya awali mkandarasi ameanza  kusafisha barabara na kuondoa udongo usiohitajika.

Alisema, mradi huo utahusisha  ujenzi wa madaraja makubwa matano na madaraja mengine madogo kama sabini, ambapo kujengwa kwa barabara hiyo kwa kiwango cha lami kunakwenda kufungua shughuli za kiuchumi kwa wananchi na kumaliza kabisa changamoto ya usafiri iliyopo hivi sasa.

Alisema,kazi inakwenda vizuri na kasi ya mkandasari ni kubwa na mara barabara hiyo itakapokamilika itasaidia sana kiuchumi ikiwamo usafirishaji wa makaa ya mawe na kuongezeka kwa wawekezaji kwenye sekta ya madini ya makaa ya mawe.