WATENDAJI Tunduru waagizwa kuwafikia wananchi na kusikiliza kero zao

Imewekwa kuanzia tarehe: February 1st, 2024

Mkuu wa Wilaya ya Tunduru mkoani Ruvuma Mhe. Wakili Mtatiro  amewaagiza watumishi wa serikali  kwenye vijiji na Kata  kuwafikia wananchi ili kusikiliza kero na kuweza kuzitatua kwa kuzipatia suluhisho la kudumu. 

Akizungumza na wananchi wa kijiji cha Matemanga kwenye mkutano wa hadhara  Mheshimiwa Mtatirro amesema wananchi wanakabiliwa na kero mbalimbali kwenye maeneo hayo hivyo ni vema watumishi wa umma kuwajibika na kwenda kuwasikiliza badala ya kumsubiri Mkuu wa Wilaya.

Mtatiro  amewasisitiza  wananchi  kuongeza mashamba ili kuweza kuongeza tija kwenye mazao na kuongeza uchumi wa mtu mmoja na serikali kupata mapato. .

“Tuwekeze  nguvu  kuandaa mashamba  ili kuongeza  uzalishaji wa mazao, itasaidia kuongeza faida, kila unapohudumia shamba lako kikamilifu tarajia kupata mazao ya kutosha'',alisistiza DC Mtatiro.

Mkuu wa Wilaya pia amewataka wazazi ambao bado hawajawapeleka watoto wao shule wawapeleke mara moja ili waweze kupata haki yao ya elimu ambapo amesisitiza operesheni ya kuwakamata wazazi ambao bado hawajawapeleka shule watoto wao itafanyika nyumba hadi nyumba.