WATUMISHI wapya 675 Ruvuma hawajafanyiwa upekuzi

Imewekwa kuanzia tarehe: July 17th, 2024

Mkaguzi Mkuu wa Nje kutoka Ofisi ya Taifa ya Ukaguzi CPA Deogratias Waijaha amesema watumishi wapya 675 kutoka Halmashauri za wilaya ya Mbinga,Nyasa na Mbinga mji mkoani Ruvuma hawajafanyiwa upekuzi ili wakae sawa kwenye utumishi wa umma.

CPA Waijaha amesema hayo wakati anazungumza  kwa nyakati tofauti katika kikao maalum cha Baraza la madiwani cha kujadili taarifa ya Mkaguzi na Mdhibiti Mkuu wa Hesabu za Serikali (CAG) juu ya hoja na mapendekezo CAG kwa hesabu za Mamlaka ya Serikali za Mitaa kwa mwaka wa fedha wa 2022/2023 katika Halmashauri  hizo.

Mkaguzi Mkuu huyo amebainisha kuwa kati ya watumishi hao watumishi 369 wameajiriwa katika Halmashauri ya Wilaya ya Mbinga,watumishi 225, Halmashauri ya Nyasa na watumishi 81 wa  Halmashauri ya Mji Mbinga ambapo ameagiza watumishi hao kufanyiwa upekuzi ili wakidhi sifa ya utumishi wa umma.

Hata hivyo Halmashauri zote nane za Mkoa wa Ruvuma zimepata Hati Safi katika ukaguzi wa CAG uliofanywa katika mwaka 2022/2023.