WILAYA ya Nyasa yapata mradi wa maji wa bilioni nne

Imewekwa kuanzia tarehe: September 8th, 2023

Wakala wa Maji na Usafi wa Mazingira Vijijini (RUWASA) Wilaya ya Nyasa  imetambulisha mradi mkubwa wa maji wenye thamani ya zaidi ya  shilini Bilioni 4.1utakaotatua kero ya  maji safi na Salama katika Kata mbili  za Kilosa na Mbamba bay Wilayani Nyasa.

Mradi huo  umetambulishwa katika mikutano ya Hadhara wenye lengo la kuwashirikisha  wananchi, ili waweze kushirikiana na Mkandarasi atakayetekeleza Mradi, Mkutano  iliyofanyika katika Kata ya Ofisi ya Mtendaji wa Kijiji Cha Nangombo Kata ya Kilosa  na kuhudhuriwa na wananchi na Viongozi wa Chama na Serikali.

Akizungumza katika Mkutano, Mkuu wa Wilaya ya Nyasa Mh.Filberto Sanga, amemtaka Mkandarasi anayetekeleza Mradi, kuhakikisha anajenga mradi kwa ubora na kwa wakati na kuhakikisha maji yanatoka, na kuwa Mradi endelevu kwa kuwa Serikali inalengo la kutatua kero ya maji, hivyo fedha za Serikali ziendane na thamani halisi ya Mradi. Pia amewataka wananchi kutoa ushirikiano katika Mradi na kulinda na kutunza Vyanzo vya maji.

“Ninakutaka Mkandarasi utakayetekeleza Mradi huu kuhakikisha kuwa unajenga kwa ubora na maji yanatoka, na kuwa mradi endelevu  kwa kuwa Serikali inalenga  kutatua kero ya maji, hivyo fedha za Serikali ziendane na thamani halisi ya Mradi,na wananchi naomba tushiriki kikamilifu Ujenzi wa mradi huu Kwa kuwa ni wetu na unalengo la kutatua kero ya maji katika mji wetu wa Mbamba bay Kwa kuwa tulikuwa na miradi midogo midogo

Awali akitoa Taarifa ya Miradi hiyo  Meneja wa RUWASA Wilayani Nyasa mhandisi Masoud Samila,amemtambulisha Mkandarasi Peritus Exim Private ltd kutoka Dar es salaam ndie atakayetekeleza mradi huu na amesema,wamejipanga kimkakati kusimamia na  kutekeleza miradi hiyo ili iweze kutatua  changamoto ya upatikanaji wa maji safi kwa wananchi.

Amesema Mradi huu unalenga kuhudumia wananchi wapatao 13,323 na amevitaja  vijiji vitakavyonufaika na mradi  huu ni Nangombo, Likwilu, Ruhekei, kilosa na Mbamba bay.

Ameongeza kuwa shughuli zitakazofanyika ni Ujenzi wa Tego la maji,ujenzi wa Tanki lenye ujazo wa Lita milioni Moja(1,000,000),ununuzi wa Bomba, ulazaji wa mabomba km 4.9 ujenzi wa vituo 10 vya kuchotea  maji na Miradi hiyo itatekelezwa kwa kipindi cha miezi sita na unatarajia kukamilika January 2024.

Ametoa wito kwa wananchi kushirikiana na Mkandarasi anayetekeleza mradi huu kwa kuwa anaanza mara moja baada ya kutambulishwa.

Wananchi wa Kata Hizo wameipongeza Serikali kwa, kutatua changamoto ya maji katika kata zao kwa kuwa awali walikuwa na Miradi ambayo ilijengwa zamani na miundombinu yake ilikuwa imechakaa, hivyo wamempongeza Mbunge wa Jimbo la Nyasa Mhandisi Stella Manyanya na Mkurugenzi Mtendaji Wilaya ya Nyasa Bw Khalid Khalif kwa kutatua Changamoto mbalimbali katika Wilaya ya Nyasa.