KUELEKEA kilele cha kumbukizi ya miaka 117 ya mashujaa wa vita ya Majimaji

Imewekwa kuanzia tarehe: February 20th, 2023

WAZEE WA  SONGEA  WAKUMBUSHA AHADI YA KUREJESHA NCHINI KICHWA CHA SONGEA 

WAZEE wa Baraza la Mila na Desturi la Mashujaa wa Majimaji  la Songea wametoa rai kwa serikali kutekeleza ahadi walioitoa katika kumbukizi la miaka 113 ya mashujjaa wa vita ya Majimaji  ya kurejesha nchini fuvu la kichwa cha Jemedari wa wangoni Nduna Songea Mbano kutoka nchini Ujerumani .

Jemedari wa wangoni Nduna Songea Mbano aliuawa na wajerumani mwaka 1906  pamoja na mashujaa wengine 66 wa vita  ya Majimaji iliyopiganwa kuanzia mwaka 1905 hadi 1907.

Nduna Songea Mbano alizikwa kiwiliwili kwenye makaburi ya mashujaa wa vita ya Majimaji yaliyopo kwenye Makumbusho ya Taifa ya Majimaji mjini Songea ambapo kichwa chake kilikatwa na wajerumani na kwenda kuhifadhiwa nchini Ujerumani .

Katika kumbukizi ya miaka 113  mashujaa wa Majimaji serikali  kupitia Wizara ya Maliasili na Utalii iliahidi kurejesha nchini fuvu la Nduna Songea Mbano pamoja na mafuvu mengine 200 ya mashujaa  yaliyopo nchini Ujerumani  ili kurejeshwa nchini na kufanyiwa maziko ya heshima.

Ifikapo Februari 27,2023 Mkoa wa Ruvuma utakuwa unafanya kumbukizi ya miaka117 ya mashujaa 67 wa vita ya Majimaji waliouwa kwa kunyonngwa na wajerumani Februari 27,1906.