ASKOFU Songea akemea ndoa za jinsia moja

Imewekwa kuanzia tarehe: June 7th, 2023

Askofu Mkuu wa Jimbo Kuu la Songea Mhashamu  Damian Denis Dallu  amekemea  uwepo kwa ndoa za jinsia moja na kuiomba jamii kukemea vitendo hivyo kwa nguvu zake zote.

Akiongea na waumini wa kanisa katoliki katika kanisa kuu la Mtakatifu Mathias Mulumba Kalemba mjini Songea wakati wa kutoa shukrani kwa waumini kwa ukarimu  wao kwa kanisa Askofu Dallu aliwataka waumini hao kusimamia  maadili katika familia zao.

Dallu Aliwahimiza wazazi na walezi  kutimiza majukumu yao ya kuwalea watoto katika malezi bora.

“Leo ni dominika ya mchungaji mwema ,tunaombea miito mitakatifu ili tupate watawa,mapadre,makatekista na ndoa, na chimbuka la kupata hayo ni kuwa na familia bora”  alisema askofu huyo.

Dallu aliwaambia waumini hao kuwa mambo ya uhamasishaji kuhusu kuwepo kwa ndoa za jinsia moja zinapitia katika wizara  ya afya na wizara ya elimu.

Telesphor Mbawala muumini wa kanisa katoliki alimpongeza Askofu Dallu kwa kuwahimiza waumini kuwa na familia zinazolelewa kwa kufuata maadili yaliyomema na waweze kuupinga ushoga kwa nguvu zao zote.

Dominika ya mchungaji mwema ni dominika ya kuombea miito mitakatifu katika kanisa katoliki hivyo waumini wamehimizwa kupinga ndoa za jinsia moja ili kuendelea kupata miito mitakatifu kwa kuwa na familia bora zenye maadili  mema yenye kumpendeza Mungu.