BARAZA la madiwani la Halmashauri ya Songea lafikia ukomo

Imewekwa kuanzia tarehe: June 14th, 2020

Mwenyekiti wa Halmashauri ya Wilaya ya Songea Mkoani Ruvuma  Rajabu Mtiula amewatahadharisha   waliokuwa Madiwani kuacha kujishughulisha na kazi za Udiwani baada ya muda wao kufikia ukomo.

 Mtiula ametoa tahadhari hiyo Katika kikao Maalumu cha kuvunja  Baraza la Madiwani la Halmashauri hiyo kilichofanyika katika ukumbi wa Halmashauri hiyo katika mji mdogo wa Peramiho.

“Baada ya leo  kuvunja Baraza hili Madiwani hampaswi kujishughulisha na kazi zozote zinazohusiana na udiwani katika kata zenu kwa sababu utakuwa umevunja sheria na unaweza kushitakiwa’’,alisisitiza.

Hata hivyo Mtiula amemshukuru Mkurugenzi na  Wataalamu wa Halmashauri hiyo kwa kazi nzuri ya kusimamia  utekelezaji wa Ilani ya CCM  katika kipindi cha miaka mitano.

Kwa upande wake Mkurugenzi Mtendaji  wa Halmashauri  hiyo Simoni Bulenganija amewashakuru madiwani hao kwa ushirikiano mkubwa waliotoa katika kusimamia shughuli mbalimbali za Halmashauri hiyo  na kufanikiwa kutekeleza miradi mingi ya maendeleo kwa asilimia 100.

Naye Makamu Mwenyekiti wa Halmashauri hiyo Menasi Komba akizungumza kwa niaba ya Madiwani ametoa rai kwa  Wataalamu kuendelea kushirikiana ili kuwahudumia wananchi wa Halmashauri hiyo ambao wana kiu ya kupata maendeleo.

Kulingana na sheria,kanuni,taratibu na miongozo ya TAMISEMI ,ukomo wa kazi ya  madiwani  ni  wa miaka mitano.