BEETROOT mmea wenye uwezo wa kusaidia wagonjwa wa upungufu wa damu,kisukari,kansa na figo kivutio nanenane Songea

Imewekwa kuanzia tarehe: August 6th, 2020

Sikukuu ya wakulima maarufu kama MAONESHO YA NANE NANE yaliyoanza tarehe 1 Agosti Songea Mkoani Ruvuma yamepambwa na  Zao  la Beetroots ambao umeonekana kuwa ni zao geni kwa wananchi wa Mkoa huo.

Akizungumza katika maonesho hayo ya Nane nane mtaalamu  anayewakilisha  mkoa wa Ruvuma na Njombe kutoka kampuni ya SEEDCO Frola Mgangala amesema Beetroots ni jamii ya kiazi chekundu na  kwamba ni zao zuri katika kujenga afya ya binadamu akiwa mzima au mgonjwa.

‘’Beetroots ni mmea ambao unaongeza uwingi wa damu kwa saa  24,kwa wazee inaboresha cd4 zao, kwa sababu mwili unakuwa unashambuliwa na maradhi, inarudisha kinga vizuri,kwa akinamama wajazito wanapoenda kliniki wanapewa dawa badala yake wanaweza kutumia Beetroot,pia kwa watoto wadogo badala ya kutumia vitamini ‘’A’’ anaweza kutumia  beetroot’,alisisitiza Mgangala.

Mtaalamu  huyo wa SEEDCO ameelezea mmea  wa Beetroot unaweza kumsaidia mgonjwa yeyote akiugua na kurudisha kinga ya mwili kwa haraka na majani ya mmea huo unaweza kutumika kama mboga zingine za majani,pia unaweza kutengeneza juisi na  kuliwa kama karoti na  kutumika kama kiungo cha mboga.

Afisa Kilimo kutoka Wilaya ya Tunduru  Lucy Komba akizungumza kwenye maonesho hayo mjini Songea ameeleza kuwa mmea wa Beetroot unaweza kutumika kwa matumizi mengi hasa katika kuboresha afya ya binadamu.

‘’Matumizi ya mmea huo unaweza kutafuna kama kiazi au karoti inasaidia kwa wenye matatizo ya  figo,kisukari,Ugonjwa wa moyo  na kansa ’’,alisisitiza.

Hata hivyo Komba amesema zao hilo linaweza kulimwa kwenye bustani ndogo nyumbani  tangu kupanda mpaka kukomaa linachukua muda wa miezi miwili na kuwa tayari kwa matumizi na mbegu ya zao hilo zinapatikana kila Halmashauri zote za  Mkoa wa Ruvuma.

Kaulimbiu ya maonesho ya nanenane mwaka huu inasema kwa maendeleo ya kilimo,mifugo na uvuvi chagua viongozi bora 2020.

Imeandaliwa na Aneth Ndonde

Ofisi ya Habari Mkoa Ruvuma

Agosti 4,2020