DC atoa siku mbili Kampuni za mikopo kurudisha kadi za watumishi

Imewekwa kuanzia tarehe: March 8th, 2024

Mkuu wa Wilaya ya Mbinga Mheshimiwa Aziza Mangosongo ametoa siku mbili kwa Kampuni za mikopo ya fedha kurudisha kadi za benki za watumishi kwa kuwa ni kinyume cha sheria kumiliki kadi za benki ambazo sio mali yao.

Mangosongo ametoa agizo hilo wakati anazungumza na wakuu wa Taasisi za kibenki,kampuni  za ukopeshaji fedha na watumishi wa kada  tofauti za elimu, afya, utawala katika kikao kilichofanyika katika ukumbi wa FDC  mjini Mbinga.

“Ni kosa kisheria kumiliki kadi ya benki ambayo sio mali yako hata kama watumishi hao wanadaiwa “,alisema Mangosongo.

Amesema asilimia kubwa ya watumishi huacha kadi zao kwa wakopeshaji kama dhamana hali ambayo urahisisha miamala ya kifedha kufanyika muda wowote pasipo uangalizi wa wahusika.

Hata hivyo Mangosongo amezitaka kampuni hizo kuwasilisha nyaraka na taarifa za mikopo Kiwango cha riba kinachotozwa pamoja na changamoto zinazowakabili wakopeshaji na wakopaji.

Amemuagiza Afisa Biashara wa Halmashauri ya Mji Mbinga kukagua upya leseni za kampuni hizo ili kuona uhalali wake.

Mkuu wa Wilaya ametoa rai kwa watumishi kubuni miradi mipya ya kuwaingizia kipato nje ya kazi zao, ili kuepuka mikopo isiyo na tija

Kwa upande wake Mkuu wa Shule ya Msingi Mihango Geofrey Rugomora amesema watumishi wengi ni wahanga wa mikopo hiyo lakini kutokana na elimu mpya ambayo wameipata itasaidia kuongeza  umakini kabla ya  kufanya maamuzi ya kukopa fedha hizo.