DC NAMTUMBO awafunda walimu

Imewekwa kuanzia tarehe: March 20th, 2023

MKUU wa wilaya ya Namtumbo mkoani Ruvuma  Mheshimiwa  Ngollo Ng’waniduhu Malenya  amewataka walimu wilayani  Namtumbo  kusimamia maadili katika shule zao ili kudhibiti mmomonyoko wa maadili ambao unajitokeza hivi sasa.

Mheshimiwa Malenya aliyasema hayo kwenye kikao kilichowashirikisha waratibu elimu kata,walimu wakuu,maafisa idara ya elimu,afisa tume ya utumishi wa walimu( TSC) na afisa kutoka ofisi ya mkaguzi na mdhibiti ubora wa  shule.

Aidha Malenya  amesema mmomonyoko wa maadili hivi sasa unazidi kuongezeka na kuwataka walimu hao kusimamia kudhibiti umomonyoko wa maadili  kwa kutoruhusu kufanyika mapenzi mashuleni kati ya walimu  wa kiume na wanafunzi wa kike  lakini pia walimu wa kike na wanafunzi  wa kiume,lakini pia wanafunzi kwa wanafunzi .

Hata hivyo Malenya  alifafanua kuwa yeye ni mpenda mabadiliko yaliyochanya ,mpenda ukweli  na mpenda  usafi ,na kuwaomba walimu na viongozi wote wa wilaya ya Namtumbo kufanyakazi kama timu kwa kushirikiana kwa dhati ili kuwa na taswira ya ushindi katika mambo yanayofanyika wilayani humo.

Lakini pia mkuu wa wilaya huyo aliahidi walimu  kwenda kuzungumza na wananchi kila kata wilayani humo kuhimiza swala la wanafunzi  kupata chakula shuleni ili kuwasaidia wanafunzi hao waweze kujikita zaidi katika masomo badala ya kutembea umbali mrefu kufuata chakula na wakati mwingine kutopata chakula kabisa.

Mkurugenzi  wa Halmashauri  ya wilaya ya Namtumbo Chiriku Hamis Chilumba  pamoja na mambo mengine alimwambia mkuu wa wilaya kuwa halmashauri ya wilaya ya Namtumbo ina jumla ya walimu 882 huku mahitaji ni walimu 1351 ambapo sasa kuna upungufu wa walimu 469 .

Afisa elimu Msingi wa Halmashauri ya  wilaya ya Namtumbo  Juma Fulluge aliagiza walimu wakuu kusimamia taaluma mashuleni  kwa kuhakikisha walimu wanafundisha ipasavyo na  kwa kumaliza mada zilizopo .

Fulluge  alisisitiza kuwa  ofisi yake itakuwa inafuatilia ufundishaji katika kila shule,ufanyikaji wa mitihani ya mihula,ufanyikaji wa majaribio ya kila mwezi  na utoaji wa mazoezi  kwa wanafunzi  na kukazia  ufundishaji kwa vipindi vya ziada kwa wanafunzi wa darasa la nne na la saba.

Mustapha  Ponera mwalimu mkuu wa shule ya msingi Namtumbo akizungumza kwa niaba ya walimu wakuu wenzake alisema wao kama walimu wakuu wanaenda kusimamia taaluma ipasavyo na kuwahakikishia viongozi wa wilaya ya Namtumbo  kuwa yale yote yaliyosisitizwa na viongozi hao yanaenda kufanyiwa kazi  na matokeo chanya yatapatikana alisema mwalimu huyo.

Kikao cha walimu wakuu,waratibu elimu kata na maafisa wilayani Namtumbo kilifanyika jana katika ukumbi wa Halmashauri ambapo lengo la kikao hicho kilikuwa kuwahimiza kusimamia majukumu yao ya kila siku kwa kuwasisitiza walimu kufundisha madarasani pamoja na ugawaji wa vishikwambi 21 kwa waratibu elimu kata  kwa kata21 zilizopo  wilayani Namtumbo.