DC SONGEA alivyowafariji wanafunzi wa kidato sita kuelekea mtihani wa Taifa

Imewekwa kuanzia tarehe: April 25th, 2024

Mkuu wa Wilaya ya Songea Mkoani Ruvuma Mheshimiwa Kapenjama Ndile amefanya ziara ya kuzitembelea shule za sekondari zenye wanafunzi wa kidato cha sita katika Manispaa ya Songea  kwa lengo la kuwatia moyo kuelekea katika mtihani wa Taifa unaotarajia kufanyika Mei  6 hadi 24 mwaka huu.

Sekondari ambazo Ndile amezitembelea ni  shule ya Sekondari Msamala, Dkt. Emmanuel Nchimbi na Sekondari Londoni.

Akizungumza na wanafunzi wa Sekondari hizo kwa nyakati tofauti amewaasa wanafunzi hao kujiamini na kumtanguliza  Mwenyezi Mungu  na kuzingatia masomo waliyofundishwa darasani.

Amewatahadharisha wanafunzi hao kutojihusisha na vitendo vya kugushi au kufanya udanganyifu wowote katika mitihani yao  hali inayoweza kuwasababisha matatizo.

Mkuu wa Wilaya ametoa kilo  180 za mchele kwa shule tatu za sekondari alizozitembelea  sawa na kila shule kilo 60.

 Wanafunzi hao wamemshukuru Mkuu wa Wilaya kwa kuwapatia mchele na kuishukuru Serikali kwa kuwajengea miundombinu bora ya shule iliyosababisha wanafunzi hao kusoma katika mazingira ya kuvutia.