MBINGA yagawa dawa za kinga za tiba za USUBI kwa asilimia 100.4

Imewekwa kuanzia tarehe: September 11th, 2023

HALMASHAURI  ya Wilaya ya Mbinga  mkoani Ruvuma imefikia  lengo la utoaji dawa  za Kinga tiba za Usubi kwa  kuwafikia wananchi 229, 414 sawa na asilimia  100. 4  ukilinganisha na mwaka 2022  ambapo zoezi hili lilifanikiwa kwa asilimia  84.

Kwa mwaka 2023  zoezi  la utoaji  dawa za Kinga  tiba  katika ngazi ya jamii  lililenga kuwafikia  wananchi 228,466 waishio katika viunga vya Halmashauri ya Wilaya ya Mbinga.

Kaimu  Mkuu wa  Idara ya huduma za Afya, Lishe na Ustawi wa Jamii  Halmashauri ya Wilaya ya Mbinga Dkt. Amad Mwalukungu ameeleza kuwa  mafanikio hayo yametokana na muitikio mkubwa wa wananchi baada ya kupatiwa elimu juu ya  faida ya dawa za Kinga tiba za Usubi.

"  Tumefikia  lengo  tulilojiwekea ,  na kabla ya yote tulitoa elimu ya kutosha na hii imesaidia  sana wananchi kujitokeza na kumeza dawa" Amebainisha Mwalukunga

Amefafanua kuwa zoezi hili la utoaji  wa dawa za Kinga tiba za Usubi  lilitekelezwa kwa siku saba kuanzia  tarehe 17 hadi 23 mwezi Agosti  katika  Kata 29  za Halmashauri ya Wilaya ya Mbinga.

Kwa upande wake Mratibu wa magonjwa  yaliyokuwa hayapewi kipaumbele  Dkt. Joseph Washa Washa amebainisha kuwa zoezi hili liliratibiwa kwa kuwafuata wananchi katika Kaya zao ( nyumba kwa nyumba), hatua hii imewapunguzia gharama wananchi na kuwaondolea usumbufu wa kwenda katika vituo vya afya kupata huduma.