MBINGA yakusanya zaidi ya bilioni 6.4,yavuka malengo ya ukusanyaji mapato,

Imewekwa kuanzia tarehe: September 9th, 2023

HALMASHAURI ya Wilaya ya Mbinga mkoani Ruvuma  imevuka lengo katika ukusanyaji wa mapato kwa  kukusanya mapato ya ndani kiasi cha shilingi  Bil. 6.478 katika  mwaka wa fedha 2022/ 2023 ulioanza  Julai 01,  2022 hadi Juni 30,  2023.

 Mwenyekiti wa Halmashauri hiyo mheshimiwa Deusderius Haule amesema Makisio  ya awali ya  Halmashauri  kwa mwaka wa fedha 2022/2023  yalikuwa  Shilingi  4,598,598,800 yakijumuisha mapato lindwa na mapato halisi.

Amebainisha kuwa Mapato hayo yametokana na  kodi na tozo, miamala ya kibiashara,tozo na ushuru mbalimbali,misaada kutoka nje pamoja na  mapato mengineyo.

Haule  ameyataja  kuwa jumla ya mapato  ya Ruzuku  yaliyopokelewa ni Shilingi Bil. 30.7  fedha ambazo zimetumika  kwa matumizi ya kawaida na maendeleo kama vile stahiki za  watumishi, manunuzi ya  huduma mbalimbali,matengenezo  pamoja na haki za kijamii.

Kwa upande wake  Katibu Tawala Msaidizi Sehemu ya usimamizi wa Menejimenti,Ufatiliaji na Ukaguzi (MMI)  Mkoa wa Ruvuma Phiniel Mbula  ameipongeza Halmashauri ya Wilaya ya Mbinga kwa kusimamia ukusanyaji wa mapato ameitaka Halmashauri hiyo kuendelea kuimarisha usimamizi katika ukusanyaji  na matumizi ya mapato.