MKUU wa Mkoa wa Ruvuma aagiza, watumishi Tunduru wachukuliwe hatua

Imewekwa kuanzia tarehe: June 16th, 2021

MKUU wa mkoa wa Ruvuma Brigedia Jenerali Wilbert Ibuge, ameagiza wataalam wa Halmashauri ya wilaya Tunduru ambao wamesababisha Halmashauri hiyo kupata hati yenye mashaka kutokana na hoja za mkaguzi na mdhibiti mkuu wa hesabu za Serikali(CAG) wachukuliwe hatua.

Brigedia Jenerali Ibuge ametoa agizo hilo  kwenye kikao cha Baraza la madiwani la Halmashauri hiyo, kilichokaa kwa ajili ya kujadili hoja zilizotolewa na mkaguzi na mdhibiti wa hesabu za Serikali kwa mwaka wa fedha 2019/2020.Amesema, hoja zilizotolewa na CAG katika Halmashauri hiyo zimetokana na uzembe kwa baadhi ya wataalam wake kwa kutofuata sheria na kanuni za ukusanyaji mapato na matumizi ya fedha zinazopatikana kutoka kwenye vyanzo vyake vya ndani.

“kwa hoja zilizotolewa na mkaguzi na mdhibiti mkuu wa hesabu za Serikali katika Halmashauri yenu kwa kiasi kikubwa zimetokana na uzembe wa watumishi, na hoja hizo zimekuwa zinajirudia  mwaka hadi mwaka  kwa hiyo dhahiri watumishi  hawataki kujifunza na kujirekebisha, badala yake wanafanya kazi kwa mazoea”amesema.

Mkuu wa mkoa amesisitiza kuwa,ni lazima watumishi  hao wawajibike na kuchukuliwa hatua  ili iwe fundisho kwa watumishi wengine wanaoshindwa kutekeleza  wajibu wao na kusababisha upotevu wa mapato na kuwepo kwa hoja za mkaguzi na mdhibiti mkuu wa hesabu za Serikali.

Amesema, katika matokea ya ukaguzi wa hesabu kwa mwaka wa fedha ulioisha tarehe 30 Juni 2020 Halmashauri hiyo imefanya vibaya tofauti na miaka ya nyuma ambapo kwa miaka mitano kuanzia mwaka 2014/2015 hadi 2018/2019 imepata hati safi.

Amesema,  kupata hati yenye mashaka inatokana na sababu mbalimbali ikiwemo kutofanyika kwa  marekebisho ya hati za madai yaliyofanyika kwenye mfumo wa ukusanyaji wa mapato bila ya kuwa na nyaraka toshelezi ambayo ni shilingi 1,232,598,827.

Alitaja sababu nyingine iliyosababisha Halmashauri kupata hati yenye mashaka ni kuwepo kwa maelezo yasiojitosheleza kuhusiana na madai yaliyopoteza zaidi ya shilingi  24,296,173.Amesema, Halmashauri ya Tunduru kupata hati yenye mashaka siyo jambo jema hasa kwa Halmashauri yenye sifa ya kufanya vizuri katika suala zima la maendeleo na kuagiza kila mmoja ahakikishe anawajibika ili Halmashauri hiyo iendelee kupata hati safi kama ambavyo imekuwa kwa miaka ya nyuma.

Hata hivyo, amewapongeza kwa namna wanavyoifanyia kazi taarifa ya mdhibiti na mkaguzi mkuu wa Hesabu za Serikali ambapo katika utekelezaji wa hoja na mapendekezo yaliyotolewa kwenye taarifa ya CAG  Halmashauri imefanikiwa kufunga hoja 98 kati ya 108 za miaka ya nyuma  hivyo kusalia hoja 8 kwa hesabu jumuishi.

Amesema, kwa upande wa mfuko wa pamoja wa afya(Health Basket Fund) Halmashauri imefunga hoja 20 kayi ya 25 za miaka ya nyuma na kusalia hoja 5 ambazo zipo kwenye utekelezaji.Aidha,katika ripoti ya mwaka 2019/2020 kati ya hoja 29 zilizotolewa hoja 19 zimefungwa na kubakiwa hoja 10  na kwa upande wa mfuko wa pamoja wa afya hoja na mapendekezo 6 yaliyotolewa,hoja 3 zimefungwa.

Amewataka,kujipanga kwa ajili ya ukaguzi unaokuja  na utendaji wa majukumu yao siku zote ulenge kuzingatia taratibu ili kuzuia hoja na siyo kuwa sehemu ya kuzalisha hoja za ukaguzi na kuwasihi madiwani kuwa  makini na kufuatilia utekelezaji wa hoja hizo.

Kwa upande wake Mkaguzi mkuu wa nje wa ofisi ya Mkaguzi na mdhibiti wa hesabu za Serikali(CAG) mkoa wa Ruvuma Deogratius Waijaha ameshauri madiwani na watendaji wa Halmashauri hiyo, kufanya kazi kwa ushirikiano  ili kuwezesha kudhibiti  upotevu wa mapato.Amewataka watendaji katika Halmashauri  ya Tunduru kuhakikisha wanazingatia sheria za manunuzi,kanuni,taratibu pamoja na kusimamia matumizi ya mashine za EfdS pamoja na mfumo wa POS.

Imeandikwa na Muhid Amri,Mwandishi magazeti ya serikali

Juni 16,2021