MKUU wa Mkoa wa Ruvuma akemea mahubiri yanayoleta chuki

Imewekwa kuanzia tarehe: January 30th, 2024

MKUU wa Mkoa wa Ruvuma Kanali Laban Thomas amekemea mahubiri yanayoleta chuki  na kuhatarisha amani na utulivu uliopo nchini.

Kanali Thomas ameyasema hayo wakati anazungumza na viongozi wa Taasisi mbalimbali za kidini mkoani Ruvuma kwenye ukumbi wa Manispaa ya Songea.

Amewaasa viongozi wa dini kushirikiana na kuacha kudharauliana badala yake kujenga umoja wa madhehebu ya dini na kuzungumzia  changamoto na mafanikio waliyonayo kwa manufaa ya watanzania wote.

“Katika mahubiri yenu msisahau kuliombea Taifa letu,siasa zisiwagawe viongozi wa dini,tuangalia kwanza nchi yetu ya Tanzania,msikubali kuliingiza Taifa kwenye matatizo kisa Imani ya dini au vyama vya Siasa’’,alisisitiza RC Thomas.

Amesisitiza kuwa Tanzania ni moja na kamwe haiwezi kugawanyika kwa sababu ya migogoro ya kidini au kisiasa ambapo pia amewaomba viongozi hao wa dini  kuimarisha malezi bora kwa vijana na  ili kuwa na Taifa lenye maadili mema.

Ametahadharisha kuwa ndoa nyingi  zinavunjika kwa vijana ambapo amesema vijana wengi wanaingia kwenye ndoa bila kufanya maandalizi ya kutosha na kukosa mafundisho ya ndoa kutoka kwa viongozi wa dini.

Katika hatua nyingine Mkuu wa Mkoa amewaomba viongozi wa dini kuwahimiza wazazi na walezi ambao bado hawajawapeleka Watoto wao shule wafanye hivyo mara moja.

Amesema kwa Watoto wanaosoma shule za serikali wanasoma bila ada na kwamba hata kama mtoto hana sare za shule wazazi na walezi wahakikishe wanampeleka mtoto  shule.

Akizungumza kwenye kikao hicho Askofu Noel Mbawala wa Kanisa la Upendo Masihi KIUMA wilayani Tunduru  ameipongeza serikali kwa kukemea mahubiri yaliyokuwa yanaleta uchochezi.

Amesema ili kuweka mahusiano mema Taasisi ya KIUMA  imeajiri watumishi wengi waislamu ili kuwa na amani na uhusiano ulio mwema ambapo ametoa wito kwa Taasisi nyingine za kidini kuiga mfano huo.

Hata hivyo ameiomba serikali kuchukua hatua  kwa vijana ambao wanatembea nusu uchi ambapo amedai msako wa kuwaondoa akina dada poa kutoka jijini Dar es salaam,wale akina dada wamerudi mikoani ambako wanaendeleza vitendo hivyo.

Amemuomba  Mkuu wa Mkoa  kwa kusaidiana na viongozi wa dini kuwakusanya akinadada hao ambao amedai wameingia mkoani Ruvuma ili kukaa nao na kuangalia namna ya kuwawezesha ikiwemo kuwapa mitaji midogo  na kupewa elimu ya biashara ili waaache  biashara haramu ya kujiuza.

Viongozi hao wa dini wamemuomba Mkuu wa Mkoa kushughulikia changamoto mbalimbali zikiwemo uboreshaji wa miundombinu ya barabara katika baadhi ya mitaa mjini Songea, kudhibiti mgawo mkali wa  maji eneo la Misufini Mshangano na mlundikano wa takataka  katika eneo la Bombambili mjini Songea.

Mkuu wa Mkoa ameahidi kuzitafutia ufumbuzi changamoto zote ambazo wamezieleza ambapo amesema serikali ipo tayari kuendeleza ushirikiano na madhehebu ya dini ili kuwaletea maendeleo ya kimwili na kiroho.

Mkuu wa Mkoa wa Ruvuma anaendelea na ziara ya kukutana na makundi mbalimbali ili kusikiliza kero zao na kuzitafutia ufumbuzi.