MRADI wa maji MkowelaTunduru kuimarisha ndoa

Imewekwa kuanzia tarehe: June 29th, 2020

SERIKALI kupitia  Mamlaka ya Maji safi vijijini RUWASA Wilaya ya Tunduru inatekeleza mradi wa maji safi ya bomba wa Mkowela Kata ya Namakambale ambao unagharimu zaidi ya sh.milioni 160.

Akizungumza mara baada ya kukagua mradi huo,Mkuu wa Mkoa wa Ruvuma Christina Mndeme amesema ameridhishwa na mradi huo ambao amesema utaimarisha ndoa za wanawake baada ya kuwa kero kwa waume zao kutokana na kuchelewa kutembea umbali mrefu kufuata maji ya visima.

Amesema serikali ya awamu ya tano katika kuhakikisha inapunguza kero ya maji katika Mkoa wa Ruvuma imetoa zaidi ya shilingi bilioni 30 za kutekeleza miradi mbalimbali ya maji katika wilaya zote .

“Hivi sasa mtaondokana na kero ya kupampu maji kwenye visima itakuwa ukifungua koki  maji yanatoka haraka ,kwa hiyo utakuwa unatembea umbali mfupi unapata maji unarudi nyumbani’’,alisisitiza Mndeme.

Kwa upande wake Meneja wa RUWASA Wilaya ya Tunduru Primy Damas  amesema kati ya fedha ambazo zimeletwa kutekeleza mradi huo ambazo ni zaidi ya milioni 160,hadi sasa zimetumika zaidi ya shilingi milioni 43 na kwamba mradi umefikia asilimia 80 na utakapokamilika utaweza kuhudumia watu 3.000.

Amesema ujenzi wa mradi huo unahusisha ujenzi wa tanki lenye ujazo wa lita 50,000,nyumba ya mtambo,uchimbaji mitaro na ulazaji wa mabomba ya maji kwa umbali wa kilometa 3.2,ujenzi wa vituo nane vya kuchotea maji,ufungaji wa pampu na kuvuta umeme katika nyumba ya mitambo.

Imeandikwa na Albano Midelo

Afisa Habari Mkoa wa Ruvuma

Juni 28,2020