RUVUMA Kinara chanjo ya UVIKO 19

Imewekwa kuanzia tarehe: August 6th, 2022

TAMASHA la Mziki Mnene linalo hamasisha utoaji wa Chanjo ya UVIKO 19 kwa jamii limezinduliwa rasmi Ruvuma.

Tamamsha hilo limezinduliwa na Mkuu wa Wilaya ya Songea Pololeth Mgema akimwakilisha Mkuu wa Mkoa wa Ruvuma Kanali. Laban Thomas limefanyika  katika Uwanja wa Majimaji Manispaa ya Songea.

Mgema katika uzinduzi huo amesema Rais wa Jamhuri ya Muungano wa Tanzania alijitokeza hadharani kuchanja Chanjo ya UVIKO 19 Julai 28,2021 ili kuonyesha njia ya kujikinga na Ugonjwa wa Korona.

Amesema Mkoa wa Ruvuma ulizindua Chanjo ya UVIKO  19 Agosti 4,2021 akiongoza aliyekuwa Mkuu wa Mkoa wa Ruvuma Brigedia Jenerali Wilbert Ibuge katika Ukumbi wa Manispaa ya Songea na kuendelea katika Halmashauri.

Hata hivyo amesema Serikali iliona vyema  kuwa na Mpango wa jamii Shirikishi na harakishi ya utoaji wa chanjo dhidi ya UVIKO 19 kama ilivyoelekezwa na utekelezaji ulianza rasmi Septemba 22,2021.

Mgema amesema Mkoa ulipokea Wadau wa kuwezesha kuchanja Aprili ,2022 kama vile USAID FHI360 kupitia mradi wa EpiC,Juni ,2022 Mkoa ulipata  mdau USAID- AFYA YANGU na kulenga watu wanaoishi na UKIMWI kufikiwa na huduma ya Chanjo.

“Hadi kufikia  Julai 31,2022 Mkoa umechanja watu 703,891 kati ya 957,938  ambao wamekalisha Dozi  sawa na asilimia 73 na kuwa kinara  kufikia lengo la asilimia 70 Kitaifa”.

Mganga Mkuu wa Mkoa wa Ruvuma Louis Chomboko akizungumza katika Tamasha Hilo amesema wananchi wa Mkoa wa Ruvuma wanamwamko Mkubwa wa kuchanja isipokuwa kwa wananchi wachache,jitihada  za kutoa elimu zinaendelea ili kuhakikisha kila mwanaruvuma anafikiwa na Elimu  ya Chanjo ya UVIKO 19.

Imeandaliwa na Aneth Ndonde

Kutoka Kitengo cha Mawasiliano Serikalini Ofisi ya Mkuu wa Mkoa wa Ruvuma

Agosti 6,2022.