MKOA wa Ruvuma kuzindua wiki ya unyonyeshaji maziwa ya mama Agosti Mosi

Imewekwa kuanzia tarehe: July 30th, 2023

MKOA wa Ruvuma unatarajia kuzindua wiki ya unyonyeshaji wa maziwa ya mama Duniani,Agosti Mosi,2023 katika Kituo cha Afya kata ya Ruvuma kilichopo Halmashauri ya Manispaa ya Songea kuanzia saa 2:30 asubuhi.

Katibu Tawala wa Mkoa wa Ruvuma Ndugu Stephen ndaki amesema  Tanzania inaungana na nchi nyingine Duniani kuadhimisha wiki ya unyonyeshaji wa maziwa ya mama ambayo itaanza Agosti Mosi hadi 7 mwaka huu.

“Lengo la kuhamasisha unyonyeshaji maziwa ya mama ni kulinda na kuendeleza afua ya unyonyeshaji kama njia mojawapo ya kuboresha hali ya lishe kwa watoto’’,alisisitiza Ndaki.

Hata hivyo amesema kwa mwaka huu wiki ya unyonyeshaji maziwa katika Mkoa wa Ruvuma,itafanyika katika Halmashauri zote nane  za Mkoa wa Ruvuma ambapo ametoa rai kwa viongozi,watendaji na wananchi kushiriki kikamilifu kwenye maadhimisho hayo .

Kaulimbiu ya mwaka huu ya wiki ya unyonyeshaji maziwa ya mama inasema “Saidia unyonyeshaji,wezesha wazazi kulea Watoto na kufanya kazi zao kila siku’’.