RUWASA yatekeleza mradi wa maji wa milioni 50 katika kijiji cha Chimate Nyasa

Imewekwa kuanzia tarehe: June 24th, 2020

SERIKALI ya awamu ya tano imetoa sh.milioni 50 kwa ajili ya kutekeleza mradi wa maji kwenye kitongoji cha  Mingohi kijiji cha Chimate Halmashauri ya Wilaya ya Nyasa mkoani Ruvuma.

Akisoma taarifa ya  mradi  huo, kwa Mkuu wa Mkoa wa Ruvuma Christina Mndeme alipokagua mradi huo,Kaimu Meneja wa Wakala wa Maji na Usafi wa Mazingira vijijini (RUWASA) Wilaya ya Nyasa Mhandisi Evaristo Ngole amesema utekeleza wa mradi huo umefikia asilimia 90 ambapo hadi sasa zimetumika zaidi ya sh.milioni 43.

Mhandisi Ngole amesema mradi ulianza kutekelezwa Februari mosi mwaka huu na kwamba  kulikuwa na mikataba mitatu ya Utekelezaji wa mradi huo ikiwemo ujenzi wa tanki lenye mita za ujazo  25,000 kwenye chanzo cha maji kwenye milima ya Livingstone.

‘’ Mradi unatekelezwa kwa fedha za  wadau wa maendeleo kutoka nchini Uingereza ambao hutoa fedha kupitia Wizara yetu ya Maji chini ya Mpango wa Lipa kutokana na matokeo’’,alisisitiza Ngole.

Naye Mkuu wa Wilaya ya Nyasa Isabela Chilumba amesema serikali imetoa  zaidi ya sh.milioni 390 za kujenga mradi wa maji katika vitongoji vitatu vilivyobaki vya kijiji cha Chimate ambavyo ni Mtakanini,Chimate kati na Chiwanda.

Amesema tangu kuanzishwa kwa RUWASA  Wilaya ya Nyasa imeendelea kutekeleza miradi chini ya program ya maendeleo ya sekta ya maji awamu ya pili ambapo kupitia program hiyo,miradi inatekelezwa kwa fedha za mpango wa lipa kutokana na matokeo.

Akizungumza baada ya kukagua mradi huo Mkuu wa Mkoa wa Ruvuma Christina Mndeme amesema ameridhika na Utekelezaji wa mradi wa maji katika kitongoji cha Mingohi ambao amesema umewaondolea kero wananchi ya kutumia muda mrefu kwa kutembea umbali mrefu kutafuta maji.

‘Mradi wa milioni 50,wanakwenda kufaidika wananchi  zaidi ya 1200 kwa kujengewa vituo 12 vya kuchota maji katika  kitongoji cha Mingohi ambacho tangu nchi yetu ipate uhuru  hawajawahi kupata maji ya bomba,tuna kila sababu ya kumshukuru sana Mheshimiwa Rais wetu’’,alisisitiza Mndeme.

Tangu serikali ya awamu ya tano imeingia madarakani kwa Mkoa wa Ruvuma pekee  imetoa zaidi ya shilingi bilioni 30 kwa ajili ya kutekeleza miradi mbalimbali ya maji  hali ambayo imewaondolea kero wananchi ya kutembea umbali mrefu kutafuta maji.

Imeandailiwa na Albano Midelo

Afisa Habari wa Mkoa wa Ruvuma 

Nyasa 

Juni 22,2020