SERIKALI yatoa zaidi ya bilioni 12 kujenga vituo vya kutolea huduma za afya Ruvuma

Imewekwa kuanzia tarehe: September 21st, 2020

SERIKALI ya awamu ya Tano inayoongozwa na Rais Dkt. John Pombe Magufuli imetoa fedha kiasi cha Tsh 12,854,209,081 kwa ajili ya kujenga na kukarabati vituo vya kutolea huduma za afya 25 na nyumba za watumishi kwenye Halmashauri zote n za Mkoa wa Ruvuma.

Mkuu wa Mkoa wa Ruvuma Christina Mndeme amesema Serikali ya Dkt.John Magufuli  pia imeongeza upatikanaji wa dawa katika Mkoa wa Ruvuma  kwa  kuongeza fedha kutoka Tsh 883,303,792 mwaka 2015 hadi kufikia Tshs. 4,545,139,214 mwaka 2020  ambapo upatikanaji wa dawa umeongezeka kutoka asilimia   51 mwaka 2015 hadi  asilimia 96 mwaka 2020.

"Mkoa wetu unaendelea na mapambano katika kukabiliana na tatizo la Kupunguza maambukizi ya UKIMWI ambapo hadi kufikia mwaka 2020, maambukizi ya UKIMWI yamepungua hadi kufikia  asilimia 5.6 kutoka asilimia 7 mwaka 2015'',alisema.

Kwa mujibu wa Mndeme,Idadi ya vifo vya akina mama wajawazito vimepungua kutoka vifo 46 mwaka 2015 hadi vifo 19 mwaka 2020 na kwamba  kupungua huko kumetokana na uanzishwaji wa huduma za dharura za upasuaji katika vituo vya afya vilivyoboreshwa kwa utekelezaji wa mpango wa “Tuwavushe Salama” ulioasisiwa na Mhe. Samia Suluhu Hassan, Makamu wa Rais wa Jamhuri ya Muungano wa Tanzania. 

Hata hivyo Mkuu wa Mkoa amesema hali ya vifo vya watoto chini ya miaka 5 katika mkoa wa Ruvuma vimepungua hadi kufikia 5/1000 ukilinganishwa na vifo 12/1000 mwaka 2015 na kwamba  vifo vya watoto chini ya mwaka mmoja  vimepungua kutoka vifo 9/1000 mwaka 2015 hadi vifo 3/1000   mwaka 2020 na kutaja hali hiyo inatokana na uwekezaji mkubwa uliofanyika chini ya uongozi wa Mh. Rais Dkt. John Pombe Joseph Magufuli katika sekta ya afya.

Imeandikwa na Albano Midelo

Afisa Habari Mkoa wa Ruvuma

Septemba 21,2020