WAKULIMA wa korosho Tunduru warejeshewa fedha zao

Imewekwa kuanzia tarehe: August 8th, 2021

WAKULIMA wa korosho waliotapeliwa fedha zao zaidi ya Sh milioni  44 na vyama vya msingi vya ushirika  katika msimu wa korosho wa 2020/2021  katika wilaya  ya Tunduru mkoani Ruvuma wameanza kurejeshewa fedha.

Akikabidhi fedha  kiasi cha Sh 44.2 kwa wakulima hao,Mkuu wa wilaya ya Tunduru Julius Mtatiro amesema, fedha hizo ni kati ya fedha ambazo wakulima wa korosho waliibiwa na viongozi wa vyama vya Ushirika.

Mkuu wa wilaya, ametoa siku thelathini kwa vyama vya ushirika wilayani humo kuhakikisha wanalipa fedha zilizobakia Sh milioni 11 ili kumaliza kulipa fedha zote kwa wakulima kabla ofisi yake haijaanza kuchukua hatua  dhidi ya viongozi hao.

Aidha Mtatiro, amekabidhi kiasi cha Sh. milioni 18 kwa walimu wastaafu waliodhulumiwa fedha zao na Chama cha Akiba na Mikopo (Saccos) wilayani humo.Mtatiro ametangaza msako mkali kwa walimu wote wenye tabia ya kukopa fedha  na kukabidhi kadi za Benki kwa wakopeshaji kwani kufanya hivyo ni  kuidhalilisha Serikali.

“sio akili  hata kidogo kadi ya benki ni mali ya benki hata mtu anayemiliki sio  ya kwake ni mali ya Benki,unawezaje kumkabidhi mtu mwingine akaye na kadi yako,kwa hiyo tutaendelea kuwaelimisha walimu kuhusiana na tabia hiyo na wale watakaoonekana hawaelewi basi tutalazimika kutumia nguvu kidogo kuwaelewesha”amesema Mtatiro.

Akiongea kwa  niaba ya wenzake,Mwalimu Mstaafu Juma Yasin amemshukuru Mkuu wa wilaya kutokana na jitihada anazochukua dhidi ya vyama vya akiba na mikopo ambavyo vinawadhulumu walimu na watumishi wengine wanaokwenda kukopa fedha.

Amesema, kuna walimu wengi wamekufa na wameacha fedha zao kwani hata kiasi cha Sh milioni 18 zilizokusanywa ni sehemu ndogo  ya fedha walizodhulumiwa walimu wastaafu na chama hicho.

Imeandikwa na Mhidin Amri Tunduru