WAKUU wa Taasisi za serikali Ruvuma waagizwa kusimamia miradi

Imewekwa kuanzia tarehe: January 23rd, 2024

Mkuu wa Mkoa wa Ruvuma Kanali Laban Thomas amewataka wakuu wa Taasisi za Serikali  kusimamia miradi ya maendeleo kwa umakini na kuhakikisha miradi inakamilika kwa wakati ili iweze kutoa huduma kwa wananchi.

Kanali Thomas ametoa maagizo hayo wakati anazungumza katika kikao na wakuu wa Taasisi za serikali mkoani Ruvuma kilichofanyika katika ukumbi wa Mipango uliopo Ofisi ya Mkuu wa Mkoa wa Ruvuma.

Amesema Serikali imekuwa inatoa pesa nyingi kwa ajili ya miradi mbalimbali ikiwemo barabara, Maji na Umeme ili wananchi waweze kunufaika na kazi inayofanywa na serikali kwa kupewa huduma bora.

“Tumekuwa mashahidi kila sekta inapewa pesa nyingi na Mh. Rais Dkt.samia Suluhu Hassan hivyo ni jukumu la kila Mkuu wa Taasisi  kusimamia kikamilifu miradi hiyo “‘ alisema RC Thomas.

Kanali Thomasi amewasisitiza watendaji hao kuwa na  umoja,mshikamano,kujitambua na kushirikiana na watumishi wanaowasimamia ili miradi hiyo iweze kutekelezwa kwa ufanisi na tija.

Katika kikao hicho Kanali Thomas amewaomba wakuu wa Taasisi kuwa na utamaduni  wa kupanda miti ya matunda  ambayo wataitumia kama chakula ili waweze kupambana na tatizo la udumavu katika Mkoa.

Naye, Kaimu Meneja wa TANROADS Mkoa wa Ruvuma Mhandisi Roman Mbukwini amesema wamejipanga  kukagua  barabara sehemu zilizoharibika na hatarishi na kuzifanyia marekebisho.

Akizungumza kwenye kikao hicho,Meneja wa  Mamlaka ya Maji Safi  Songea (SOUWASA) Mhandisi Patrick Kibasa amesema wanaendelea kutoa elimu kwa wananchi wasiendelee na shughuli za kibinadamu katika vyanzo vya maji ili wananchi wa mji wa Songea waendelee kupata maji safi na  salama.