WANANCHI Mbinga wachangia milioni 20 ujenzi wa zahanati

Imewekwa kuanzia tarehe: August 16th, 2024

Kamati ya Fedha, Uongozi na Mipango Halmashauri ya Wilaya ya Mbinga mkoani Ruvuma  imewapongeza wananchi wa Kijiji cha Malindindo kilichopo Kata ya Kambarage  kwa kuchangia  shilingi milioni  20  katika ujenzi wa Zahanati ambayo inatarajia kutoa huduma  kwa wananchi zaidi ya 2000 wa Kijiji hicho.

Pongezi hizo zimetolewa na  Makamu Mwenyekiti wa Halmashauri ya Wilaya ya Mbinga ambaye pia ni Diwani wa Kata ya Maguu Mhe. Bahati Mbele wakati wa ziara ya kamati hiyo  kukagua utekelezaji wa miradi ya maendeleo.

 “Hii ndio ari anayoitaka Rais Samia tuendelee kumuunga mkono katika utekelezaji wa miradi mingine iliyopo na itakayokuja kwasababu sisi ndio wanufaika namba moja wa miradi hii’’,alisema.

Naye  Mtendaji wa Kijiji cha Malindindo Cleopatra Lindi amebainisha  pamoja na nguvu za wananchi Kijiji kilipokea milioni 50 kutoka Serikali Kuu na  Zaidi ya shilingi milioni saba kutoka Ofisi ya Mkurugenzi  wa Halmashauri ya Wilaya ya Mbinga kwa ajili ya kumalizia mradi huo.