WAZIRI Mhagama awashauri wakulima kulifanya zao la mahindi kuwa la biashara

Imewekwa kuanzia tarehe: July 20th, 2024

Waziri wa Nchi Ofisi ya Waziri Mkuu (Sera, Bunge na Uratibu) Mhe. Jenista Mhagama  ambaye pia ni Mbunge wa Jimbo la  Peramiho amewashauri wananchi kulifanya zao la Mahindi kuwa zao la biashara kwa siku za usoni ili kuwaletea faida zaidi.

Waziri Mhagama ametoa kauli hiyo  hivi karibuni wakati anafanya  Mikutano miwili ya hadhara katika vijiji vya Kikunja na Mpingi vilivyopo Halmashauri ya Wilaya ya Songea Mkoani Ruvuma

Waziri Mhagama amesisitiza kuwa Rais wa Jamhuri ya Muungano wa Tanzania Mhe. Dkt. Samia Suluhu ameendelea kutoa ruzuku ya mbolea, ambapo amesema  kazi kubwa  imebaki kwa  wakulima  kuongeza juhudi katika kilimo na uzalishaji wa mahindi na mazao mengine.

 “Mwaka huu Mhe. Rais, ametutafutia masoko Nje ya Nchi, lengo letu ni kuhakikisha siku za karibuni tunafanya zao la mahindi kuwa zao la biashara ili liweze kusaidia wananchi kukuza uchumi na pato la familia.”,alisema Mhagama.

Hata hivyo  amewaomba wananchi kuendelea kuweka akiba ya chakula cha familia badala ya kuuza chakula chote ili familia  na  nchi  kwa ujumla iendelee kuwa na akiba ya chakula.